വിശുദ്ധ കുര്‍ബാനയുടെ തിരുനാള്‍ ജര്‍മ്മനിയിലെ കൊളോണ്‍ ലിഫ്രോന്‍കൃഷ് ദേവാലയത്തില്‍ ആഘോഷപൂര്‍വ്വം കൊണ്ടാടി. ജര്‍മ്മന്‍ കമ്മ്യൂണിറ്റി നേതൃത്വം നല്‍കിയ തിരുനാളില്‍ മലയാളികളടക്കമുള്ള കൊളോണിലെ ഇന്ത്യന്‍ വിശ്വാസി സമൂഹം സജീവമായി പങ്കുചേര്‍ന്നു. വിശുദ്ധ കുബാനയ്ക്ക് ഫാ. സ്റ്റെഫാന്‍ വാഗ്ണര്‍, ഫാ. മൈക്കിള്‍ സ്മിത്ത്, ഫാ. ഇംഗ്നേഷ്യസ് ചാലിശേരി &nbsp;എന്നിവര്‍ കാര്‍മികത്വം വഹിച്ചു. മുത്തുക്കുടകളുടെ അകമ്പടിയോടെ പ്രധാന നിരത്തിലൂടെ കപ്പലിലേക്ക് നടത്തിയ ദിവ്യകാരുണ്യപ്രദക്ഷിണത്തില്‍ കുട്ടികളും യുവജനങ്ങളുമടക്കമുള്ള നൂറുകണക്കിന് വിശ്വാസികള്‍ പങ്കുചേര്‍ന്നു.&nbsp;റൈന്‍ തീരത്തുണ്ടായിരുന്ന കപ്പലില്‍ പ്രവേശിച്ച് അതിൻ്റെ മുകള്‍തട്ടില്‍ ദിവ്യകാരുണ്യ ആരാധന നടത്തി. തുടര്‍ന്ന് വിവിധ കമ്മ്യൂണിറ്റികളുടെ പ്രാര്‍ത്ഥനകളുടെയും സംഗീത ആലാപനങ്ങളുടെയും അകമ്പടിയോടെ കപ്പലില്‍ ദിവ്യകാരുണ്യ പ്രദക്ഷിണം നടന്നു. സീറോ മലബാര്‍ കമ്മ്യൂണിറ്റിയുടെ ക്വയര്‍ ടീം ഗാനങ്ങള്‍ ആലപിച്ചു. ഒരു മണിക്കൂറിനു ശേഷം വിശുദ്ധ ക്ലമന്‍സ് ദേവാലയത്തില്‍ തിരികെ എത്തി സമാപനാശീര്‍വാദത്തോടെ ദിവ്യകാരുണ്യ പ്രദക്ഷിണം സമാപിച്ചു. കപ്പലില്‍ നടന്ന ദിവ്യകാരുണ്യ പ്രദക്ഷിണം വിശ്വാസികള്‍ക്ക് പുത്തന്‍ ആത്മീയാനുഭവമാണ് സമ്മാനിച്ചത്.

വിശുദ്ധ കുര്‍ബാനയുടെ തിരുനാള്‍; ചരിത്രം സൃഷ്ടിച്ച് കപ്പലില്‍ ദിവ്യകാരുണ്യ പ്രദക്ഷിണം

മുനമ്പം നിവാസികൾക്കു ഭൂമിയിലുള്ള അവകാശം നിയമപരമായി പുനഃസ്ഥാപിക്കുമെന്നും മുഖ്യമന്ത്രി വി.ഡി.സതീശൻ ഉറപ്പുനൽകി. മുഖ്യമന്ത്രിയെ സന്ദർശിച്ച കെആർഎൽസിസി സംഘത്തോടാണ് അദ്ദേഹം ഇക്കാര്യം വ്യക്തമാക്കിയത്. ജെ.ബി. കോശി കമ്മീഷൻ റിപ്പോർട്ട് നടപ്പിലാക്കുമെന്നും മുഖ്യമന്ത്രി ഉറപ്പു നല്‍കിയിട്ടുണ്ട്. മന്ത്രിമാരായ രമേശ് ചെന്നിത്തല, എ.പി. അനിൽകുമാർ, ഷിബു ബേബി ജോൺ, സി.പി. ജോൺ എന്നിവരെയും സംഘം സന്ദർശിച്ചു. കേരളത്തിലെ ലത്തീൻ കത്തോലിക്കർ നേരിടുന്ന വിവിധ പ്രശ്‌നങ്ങളും പ്രതിസന്ധികളും പ്രതിനിധി സംഘം മുഖ്യമന്ത്രിയുടെയും മന്ത്രിമാരുടെയും ശ്രദ്ധയിൽപ്പെടുത്തിയതായി ഭാരവാഹികൾ അറിയിച്ചു. ബിഷപ്പുമാരായ ഡോ. സെബാസ്റ്റ്യൻ തെക്കത്തെച്ചേരിൽ, ഡോ. സെൽവിസ്റ്റർ പൊന്നുമുത്തൻ, ഡോ. സെൽവരാജ ൻ ദാസൻ, കെആർഎൽസിസി വൈസ് പ്രസിഡൻ്റ് ജോസഫ് ജൂഡ്, ജനറൽ സെക്രട്ടറി ഫാ. ഡോ. ജിജു ജോർജ് അറക്കത്തറ, സെക്രട്ടറി പാട്രിക് മൈക്കിൾ, കെഎൽസിഎ പ്രസിഡൻ്റ് അഡ്വ. ഷെറി ജെ. തോമസ് എന്നിവരാണു മുഖ്യമന്ത്രിയെ സന്ദർശിച്ചത്. എംഎൽഎമാരായ ടി.ജെ. വിനോദ്, എം. വിൻസന്‍റ് എന്നിവരും സംഘത്തോടൊപ്പമുണ്ടായിരുന്നു.

മുനമ്പം നിവാസികൾക്കുള്ള അവകാശം നിയമപരമായി പുനഃസ്ഥാപിക്കുമെന്നു മുഖ്യമന്ത്രി

സ്നാപക യോഹന്നാനില്‍ നിന്നു യേശുക്രിസ്തു ജ്ഞാസ്നാനം സ്വീകരിച്ച സ്ഥലമായി അറിയപ്പെടുന്ന ജോർദാനിൽ ആദ്യത്തെ ക്രിസ്ത്യൻ സർവ്വകലാശാല യാഥാര്‍ത്ഥ്യമായി. യുനെസ്കോയുടെ ലോക പൈതൃക സ്ഥലമായി രേഖപ്പെടുത്തിയിരിക്കുന്ന മേഖല ഏറ്റവും പ്രധാനപ്പെട്ട തീർത്ഥാടന കേന്ദ്രങ്ങളിലൊന്നാണ്. മേഖലയില്‍ സ്ഥാപിക്കപ്പെട്ട പ്രഥമ ക്രൈസ്തവ സര്‍വ്വകലാശാലയുടെ ഉദ്ഘാടന ചടങ്ങിൽ ജോർദാനിയൻ രാജകുടുംബത്തിലെ അംഗങ്ങൾ, പാത്രിയർക്കീസുമാർ, ജെറുസലേമിലെ വിവിധ ക്രൈസ്തവ ദേവാലയങ്ങളുടെ പ്രതിനിധികള്‍, സർക്കാർ ഉദ്യോഗസ്ഥർ, നയതന്ത്രജ്ഞർ, വൈദികര്‍, അക്കാദമിക് വിദഗ്ധർ എന്നിവർ പങ്കെടുത്തു. തുടർച്ചയായ സംഘർഷം, കുടിയിറക്കം, സാമൂഹിക വിഘടനം എന്നിവക്കൊണ്ട് കൊടിയ പ്രതിസന്ധി നേരിടുന്ന മേഖലയിൽ ക്രൈസ്തവ സാന്നിധ്യം, വിദ്യാഭ്യാസം, മതാന്തര സഹകരണം എന്നിവയുടെ ഭാവിയിലെ ഒരു ചരിത്രപരമായ നിക്ഷേപമായിട്ടാണ് സഭാ നേതാക്കൾ സർവ്വകലാശാലയെ വിശേഷിപ്പിക്കുന്നത്. വിശ്വാസത്തിലും സേവനത്തിലും വേരൂന്നിയ ഒരു ദർശനത്തോടെയാണ് സര്‍വ്വകലാശാല സ്ഥാപിക്കുന്നതെന്നു പാത്രിയാർക്കീസ് ​​തിയോഫിലോസ് മൂന്നാമൻ പറഞ്ഞു. ആത്മീയ രൂപീകരണത്തെ അക്കാദമിക് മികവുമായി സംയോജിപ്പിക്കാനും, ദൈവശാസ്ത്രവും ശാസ്ത്രവും, വിശ്വാസവും യുക്തിയും തമ്മിലുള്ള സംഭാഷണം, പാരമ്പര്യവും സമകാലിക ഉത്തരവാദിത്തവും എന്നിവ വളർത്തിയെടുക്കാനും സർവ്വകലാശാല ശ്രമിക്കുന്നുണ്ടെന്ന് അദ്ദേഹം പറഞ്ഞു. ക്രൈസ്തവരുടെ പുണ്യസ്ഥലങ്ങളുടെ സംരക്ഷണത്തിനായി അബ്ദുള്ള രണ്ടാമൻ രാജാവ് ദീർഘകാലമായി നൽകിയ പിന്തുണയ്ക്ക് നന്ദി അര്‍പ്പിക്കുകയാണെന്നും പാത്രിയാർക്കീസ് ​​തിയോഫിലോസ് പറഞ്ഞു. ബാപ്റ്റിസം സൈറ്റ് ഇന്റർനാഷണൽ ഓർത്തഡോക്സ് യൂണിവേഴ്സിറ്റി (BIOU) എന്ന പേരിലാണ് യൂണിവേഴ്സിറ്റി അറിയപ്പെടുക.

യേശു ജ്ഞാനസ്നാനം സ്വീകരിച്ച ജോർദാനിൽ ആദ്യത്തെ ക്രിസ്ത്യൻ സർവ്വകലാശാല യാഥാര്‍ത്ഥ്യമായി

പാലാരിവട്ടം പി.ഒ.സി.യില്‍ 2026 ജൂണ്‍ 20-ന് &nbsp;ഏകവര്‍ഷ ദൈവശാസ്ത്ര ഡിപ്ലോമ കോഴ്‌സ് ആരംഭിക്കുന്നു. ദൈവശാസ്ത്രം, ബൈബിള്‍, ആധ്യാത്മികത, മതബോധനം, മാധ്യമപരിശീലനം, സംഘടനാപ്രവര്‍ത്തനം, നേതൃത്വകല, വ്യക്തിത്വവികാസം എന്നിവ മുഖ്യവിഷയങ്ങളാക്കി നടത്തുന്ന ഈ കോഴ്‌സില്‍ ഓരോ വിഷയത്തിലും പ്രാവീണ്യം നേടിയിട്ടുളളവര്‍ ക്ലാസ്സുകള്‍ നയിക്കുന്നു. സമഗ്രമായ പരിശീലനമാണ് ഈ കോഴ്‌സിലൂടെ ലക്ഷ്യമിടുന്നത്. കോഴ്‌സ് പൂര്‍ത്തിയാക്കുന്നവര്‍ക്ക് പാസ്റ്ററല്‍ ഇന്‍സ്റ്റിറ്റ്യൂട്ടിൻ്റെ ഡിപ്ലോമ ലഭിക്കുന്നു. എല്ലാ മാസത്തിലും രണ്ടാമത്തെ വെളളി, ശനി ദിവസങ്ങളിലായിരിക്കും പരിശീലനം സംഘടിപ്പിക്കുന്നത്. അപേക്ഷാഫോറത്തിനും വിശദവിവരങ്ങള്‍ക്കും ബന്ധപ്പെടുക. ഡീന്‍ ഓഫ് സ്റ്റഡീസ്, പി. റ്റി. ഐ., പി.ഒ.സി, പാലാരിവട്ടം, കൊച്ചി - 682 025. ഫോണ്‍: &nbsp;9447 441 109, 8113 876 979

പി.ഒ.സിയില്‍ ദൈവശാസ്ത്ര കോഴ്‌സ്

ക്രിസ്തുവിൻ്റെ തിരുശരീരരക്തങ്ങളുടെ തിരുനാളായ കോർപുസ് ക്രിസ്റ്റി തിരുനാളിനോട് അനുബന്ധിച്ച്, വിവിധ രാജ്യങ്ങളിൽ നടത്തിവരുന്ന ദിവ്യകാരുണ്യ പ്രദക്ഷിണത്തെ പ്രഘോഷിച്ചും വിശ്വാസത്തിൻ്റെ പരസ്യസാക്ഷ്യത്തെ പ്രോത്സാഹിപ്പിച്ചും ലിയോ പതിനാലാമൻ പാപ്പ. ജൂൺ മൂന്നാം തീയതി, വത്തിക്കാനിലെ വിശുദ്ധ പത്രോസിൻ്റെ ചത്വരത്തിൽ പൊതുകൂടിക്കാഴ്ച അനുവദിച്ച വേളയിലാണ്&nbsp; ഈ തിരുനാളിൻ്റെ പ്രാധാന്യത്തെയും, അത് ആഘോഷിക്കേണ്ടതിൻ്റെ ആവശ്യകതയും പാപ്പ പരാമര്‍ശിച്ചത്. വിശ്വാസത്തിൻ്റെ പരസ്യസാക്ഷ്യമാണ് ദിവ്യകാരുണ്യ പ്രദക്ഷിണമെന്ന് പാപ്പ വത്തിക്കാന്‍ ചത്വരത്തിലെത്തിയ കാല്‍ ലക്ഷത്തോളം വിശ്വാസികളോട് പറഞ്ഞു. ലത്തീൻ പ്രയോഗമനുസരിച്ച് "കോർപുസ് ക്രിസ്റ്റി" എന്ന പേരിൽ അറിയപ്പെടുന്ന, ക്രിസ്തുവിൻ്റെ തിരുശരീരരക്തങ്ങളുടെ തിരുനാൾ ഈ ആഴ്ചയിൽ നാം ആചരിക്കുകയാണെന്ന് അനുസ്മരിച്ച പാപ്പ, നമുക്കായി മുറിക്കപ്പെട്ടതും നമുക്കേവർക്കുമായി നൽകപ്പെട്ടതുമായ അപ്പമായ യേശുവിനെയാണ് വിശുദ്ധ കുർബാനയിൽ നാം ധ്യാനിക്കുന്നതെന്ന വിശ്വാസ സത്യം അനുസ്മരിച്ചു. ദിവ്യകാരുണ്യവുമായി ബന്ധപ്പെട്ട ജനകീയ ഭക്തിയുടെ ഭാഗമാണ്, വിശുദ്ധ കുർബാന എഴുന്നെള്ളിച്ചുകൊണ്ട് വിവിധ രാജ്യങ്ങളിലെ വീഥികളിലൂടെ നടക്കുന്ന ദിവ്യകാരുണ്യപ്രദക്ഷിണം എന്ന് പറഞ്ഞ പാപ്പ, വിശ്വാസത്തിൻ്റെ പരസ്യ സാക്ഷ്യവും, മനോഹരവുമായ ദിവ്യകാരുണ്യ പ്രദിക്ഷണം സജീവമായി തുടരാൻ ഏവരെയും ആഹ്വാനം ചെയ്തു.

വിശ്വാസത്തിൻ്റെ പരസ്യ സാക്ഷ്യമാണ് ദിവ്യകാരുണ്യ പ്രദക്ഷിണം: ലിയോ പാപ്പ

സ്പെയിനിലെ മാഡ്രിഡിൻ്റെ കാവൽനാഥയായ അൽമുദേന മാതാവിന് (Virgin of Almudena) ലിയോ പതിനാലാമൻ പാപ്പ ‘സുവർണ്ണ റോസാപുഷ്പം’ സമ്മാനിക്കും. 1049-ൽ ലിയോ ഒൻപതാമൻ പാപ്പ തുടക്കം കുറിച്ച ഈ വിശിഷ്ട പദവി ലഭിക്കുന്ന സ്പെയിനിലെ നാലാമത്തെ മരിയൻ തീർഥാടന കേന്ദ്രമായി ഇതോടെ അൽമുദേന മാറും. വിശുദ്ധ ജോൺ പോൾ രണ്ടാമൻ മാർപാപ്പ ‘മരിയൻ മണ്ണ്’ എന്ന് വിശേഷിപ്പിച്ച സ്പെയിനിൽ ഇതിനുമുമ്പ് വിർജിൻ ഓഫ് ദി ഹെഡ് (2009), ഔർ ലേഡി ഓഫ് മോണ്ട്സെറേറ്റ് (2023), വിർജിൻ മക്കരീന (2024) എന്നിവയ്ക്കാണ് ഈ ബഹുമതി ലഭിച്ചിട്ടുള്ളത്. ജൂൺ എട്ടിന് വൈകുന്നേരം ഔർ ലേഡി ഓഫ് അൽമുദേന കത്തീഡ്രലിൽ നടക്കുന്ന പ്രത്യേക പ്രാർഥനാ ചടങ്ങിൽ പാപ്പ സുവർണ്ണ റോസാപ്പൂവ് സമർപ്പിക്കും.കത്തീഡ്രലിൽ നടക്കുന്ന ചടങ്ങുകൾ ലളിതവും ഭക്തിസാന്ദ്രവുമായിരിക്കുമെന്ന് മാഡ്രിഡ് അതിരൂപത അറിയിച്ചു. കാർഡിനൽ ഹൊസെ കോബോ, കത്തീഡ്രൽ ചാപ്റ്റർ, മറ്റ് സഭാധികാരികൾ എന്നിവർ ചടങ്ങിൽ സംബന്ധിക്കും. പാപ്പയ്ക്ക് ഗോൾഡൻ റോസ് സമർപ്പിക്കുന്നതിനായി മാതാവിൻ്റെ രൂപത്തിന് താഴെയുള്ള പീഠത്തിൽ പ്രത്യേക ക്രമീകരണങ്ങൾ വരുത്തിയിട്ടുണ്ടെന്നും വെള്ളി കൊണ്ടുള്ള പുതിയൊരു തട്ട് ഇതിനായി സ്ഥാപിച്ചിട്ടുണ്ടെന്നും അതിരൂപത വ്യക്തമാക്കി.

അൽമുദേന മാതാവിന് ‘ഗോൾഡൻ റോസ്’ സമർപ്പിക്കാൻ ലിയോ പാപ്പ

അന്താരാഷ്ട്ര അപ്പസ്തോലിക സന്ദര്‍ശനത്തിൻ്റെ ഭാഗമായി സ്‌പെയിനിലേക്ക് ലിയോ&nbsp; പാപ്പ നടത്തുന്ന സന്ദര്‍ശനത്തിന് നാളെ തുടക്കമാകും. നാളെ ജൂൺ ആറുമുതൽ പന്ത്രണ്ടു വരെ തീയതികളിൽ നടക്കുന്ന സന്ദര്‍ശനത്തിനിടെ മാഡ്രിഡ്, ബാർസിലോണ, കനേറി ദ്വീപുകൾ എന്നിവിടങ്ങൾ പാപ്പ സന്ദർശിക്കും. സമാധാനം, സാങ്കേതികവളർച്ച, കുടിയേറ്റം തുടങ്ങിയ വിവിധ വിഷയങ്ങൾ സംബന്ധിച്ച് സഭയുടെ നിലപാടുകൾ യാത്രയിൽ പ്രത്യേകം പരാമർശിക്കപ്പെടും. നാളെ ജൂൺ 6 ശനിയാഴ്ച രാവിലെ റോമിൽ ഫ്യുമിച്ചീനോയിലുള്ള ലെയൊനാർദോ ദാവിഞ്ചി അന്താരാഷ്ട്രവിമാനത്താവളത്തിൽനിന്ന് സ്പെയിനിലേക്ക് യാത്ര തിരിക്കുന്ന പാപ്പ നിരവധി സമ്മേളനങ്ങളില്‍ പങ്കെടുക്കും. ഇരുപതിലധികം പ്രഭാഷണങ്ങളാണ് ഇതിനിടെ നടത്തുക. നിരായുധീകരണം, സമാധാന പുനഃസ്ഥാപനം, യൂറോപ്പിലെ പ്രത്യേകിച്ച് സ്പെയിനിലെ സഭ നേരിടുന്ന വെല്ലുവിളികൾ, കുടിയേറ്റം തുടങ്ങി വിവിധ വിഷയങ്ങൾ പാപ്പയുടെ പ്രഭാഷണങ്ങളില്‍ ഇടം നേടുമെന്നാണ് കരുതപ്പെടുന്നത്.ജൂൺ 9 ചൊവ്വാഴ്ച വരെ തീയതികളിൽ തലസ്ഥാനനഗരിയായ മാഡ്രിഡിലായിരിക്കും ചിലവഴിക്കുക. ജൂൺ 9 ചൊവ്വാഴ്ച മാഡ്രിഡിൽനിന്ന് സ്പെയിനിൻ്റെ വടക്കുകിഴക്കൻ പ്രദേശത്തുള്ള ബാർസിലോണയിലേക്ക് പോകുന്ന പാപ്പാ മോണ്ട്സെറാറ്റും സന്ദർശിക്കും. ജൂൺ 11 തിങ്കളാഴ്ച വരെ പരിശുദ്ധ പിതാവ് ബാർസിലോണയിലുണ്ടാകും. ജൂൺ 11 തിങ്കളാഴ്ച രാവിലെ കനേറി ദ്വീപുകളിലെ ഒന്നായ ഗ്രാൻ കനേറിയയിലേക്ക് യാത്രയാകും. തുടർന്ന് ജൂൺ 12 വെള്ളിയാഴ്ച തെനെറീഫ് ദ്വീപിലെത്തുന്ന പാപ്പ, തുടർന്ന്, വൈകുന്നേരം മൂന്നുമണിയോടെ അവിടെനിന്ന് തിരികെ റോമിലേക്ക് മടങ്ങും.

ലിയോ പാപ്പ നാളെ സ്പെയിനിലേക്ക്

സാമൂഹിക നീതിക്കും പൊതുജനക്ഷേമത്തിനുമുള്ള പ്രതിബദ്ധത പ്രകടിപ്പിച്ചുകൊണ്ട് വരാപ്പുഴ അതിരൂപത കെസിവൈഎം, മുഖ്യമന്ത്രി വി.ഡി. സതീശന് നിവേദനം സമർപ്പിച്ചു. തദ്ദേശീയ സമൂഹങ്ങളെ ബാധിക്കുന്ന നിരവധി പ്രധാന ആശങ്കകൾ ഉയർത്തിക്കാട്ടുകയും സർക്കാർ അടിയന്തര ഇടപെടൽ ആവശ്യപ്പെടുകയും ചെയ്തു. പുനരധിവാസം, മത്സ്യബന്ധനം, വിദ്യാഭ്യാസം, ഗവേഷണം, പാർശ്വവൽക്കരിക്കപ്പെട്ട വിഭാഗങ്ങളുടെ ക്ഷേമം എന്നിവയുമായി ബന്ധപ്പെട്ട വിഷയങ്ങളിലാണ് മെമ്മോറാണ്ടം ശ്രദ്ധ കേന്ദ്രീകരിച്ചത്. വല്ലാർപാടം ഇന്റർനാഷണൽ കണ്ടെയ്നർ ട്രാൻസ്ഷിപ്പ്മെന്റ് ടെർമിനൽ (ഐസിടിടി) പദ്ധതി മൂലം കുടിയിറക്കപ്പെട്ട 316 കുടുംബങ്ങൾക്കായി പ്രഖ്യാപിച്ച ദീർഘകാലമായി മുടങ്ങിക്കിടന്ന മുളമ്പിള്ളി പുനരധിവാസ പാക്കേജിന്റെ നടത്തിപ്പാണ് പ്രധാന വിഷയങ്ങളിൽ ഒന്ന്. പാക്കേജ് സമയബന്ധിതമായി നടപ്പിലാക്കുന്നത് ഉറപ്പാക്കാനും അർഹരായ എല്ലാ ഗുണഭോക്താക്കൾക്കും കൂടുതൽ കാലതാമസമില്ലാതെ എവിക്റ്റീസ് കാർഡുകൾ നൽകാനും കെസിവൈഎം നേതാക്കൾ സർക്കാരിനോട് ആവശ്യപ്പെട്ടു. പെരിയാർ നദിയിൽ അടുത്തിടെയുണ്ടായ മത്സ്യത്തൊഴിലാളികളുടെ മരണത്തെത്തുടർന്ന് മത്സ്യത്തൊഴിലാളി സമൂഹം നേരിടുന്ന ബുദ്ധിമുട്ടുകളിലേക്കും യുവജന സംഘടന ശ്രദ്ധ ക്ഷണിച്ചു. മുഖ്യമന്ത്രിയുടെ ദുരിതാശ്വാസ നിധിയിലൂടെയും മത്സ്യത്തൊഴിലാളി ക്ഷേമനിധിയിലൂടെയും ദുരിതബാധിതരായ മത്സ്യത്തൊഴിലാളികൾക്കും മത്സ്യകർഷകർക്കും മതിയായ സാമ്പത്തിക സഹായം നൽകണമെന്ന് സർക്കാരിനോട് അഭ്യർത്ഥിച്ചു.

തീരദേശ വിഷയങ്ങളിൽ സർക്കാർ അനുകൂല നിലപാട് ആവശ്യപ്പെട്ട് വരാപ്പുഴ അതിരൂപത കെസിവൈഎം

നൂറ്റിയൻപതാം ഇടവക വാർഷിക ദിനത്തോടനുബന്ധിച്ചു, ലോകത്താദ്യമായി ഒരു ഇടവകയുടെ കീഴിൽ നാന്നൂറിൽപരം ആളുകൾ ചേർന്ന് നാനൂറിൽപരം പുതിയനിയമം ബൈബിൾ കൈയ്യെഴുത്തുപ്രതികൾ സമർപ്പിച്ച് തൃശൂർ അതിരൂപത പള്ളിക്കുന്ന് അസംപ്ഷൻ ചർച്ച് ഇടവകാസമൂഹം റെക്കോർഡ് സൃഷ്ടിച്ചു. ഒന്നിച്ചുള്ള പരിശ്രമത്തിൻ്റെയും കൂട്ടായ്മയുടെയും വിശ്വാസത്തിൻ്റെയും പ്രതിഫലമായി പള്ളിക്കുന്ന് അസംപ്ഷൻ ചർച്ച് ഇടവക ചരിത്രത്തിൽ ഇടംപിടിച്ചു. മെയ്‌ 31 ഞായറാഴ്ച രാവിലെ 8 മണിക്കു നടന്ന ചടങ്ങിൽ തൃശൂർ അതിരൂപത മെത്രാപൊലീത്ത ആർച്ച്ബിഷപ്പ് &nbsp;മാർ ആൻഡ്രൂസ് താഴേത്ത് പിതാവിൻ്റെ മുഖ്യ കർമ്മികത്വത്തിൽ വിശുദ്ധ കുർബാന അർപ്പിച്ച് ആഘോഷങ്ങൾക്ക് തുടക്കം കുറിച്ചു. ബൈബിൾ പകർത്തിയെഴുതിയ എല്ലാവർക്കും 'ബെസ്റ്റ് ഓഫ് ഇന്ത്യ വേൾഡ് റെക്കോർഡ് ' സർട്ടിഫിക്കറ്റ് വിതരണം ചെയ്തു.ആറ് ഭാഷകളില്‍ ബൈബിള്‍ എഴുതി റോസി ചാക്കുണ്ണി വിസ്മയമായി. മലയാളം, ഇംഗ്ലീഷ്, ഹിന്ദി, ജര്‍മ്മന്‍, ഇറ്റാലിയന്‍, ഫ്രഞ്ച് എന്നിങ്ങനെ ആറ് ഭാഷകളില്‍ ബൈബിള്‍ പകര്‍ത്തിയെഴുതിയ റോസി ചാക്കുണ്ണി പറോക്കാരന് ചടങ്ങില്‍ സര്‍ട്ടിഫിക്കറ്റ് നല്‍കി ആദരിച്ചു.ഇടവക വികാരി ഫാ. ആൻ്റോ ചിരിയന്‍കണ്ടത്ത്, അസിസ്റ്റൻ്റ് വികാരി ഫാ. ജീസ്‌മോന്‍ ചെമ്മണ്ണൂര്‍, മദര്‍ സുപ്പീരിയര്‍ സിസ്റ്റര്‍ ജെസ്മിന്‍ കുര്യന്‍ എംഎസ്എംഐ തുടങ്ങിയവര്‍ നേതൃത്വം നല്‍കി. വന്‍ ജനപങ്കാളിത്തത്തോടെ നടന്ന ചടങ്ങ് ഇടവകയുടെ ചരിത്രത്തിലെ സുവര്‍ണ്ണ അധ്യായമായി മാറി.

400 ൽ പരം ബൈബിൾ കൈയ്യെഴുത്ത് പ്രതിയുമായി തൃശൂർ അതിരൂപത പള്ളിക്കുന്ന് അസംപ്ഷൻ ചർച്ച് ഇടവക

സമാധാനം ഒരു സിദ്ധാന്തമോ വെറും മിഥ്യയോ അല്ലെന്നും, നീതിയിലും സ്നേഹത്തിലും അധിഷ്ഠിതമായ ദൈനംദിന പ്രതിബദ്ധതയാണെന്നും സ്നേഹിക്കുന്ന ഹൃദയത്തിൽ നിന്നാണ് യഥാർത്ഥ സമാധാനം ആരംഭിക്കുന്നതെന്നും ലിയോ പാപ്പ. വത്തിക്കാനിൽ നടന്ന ആഗോള സമാധാനത്തിനു വേണ്ടിയുള്ള ജപമാല പ്രാർത്ഥനയ്ക്ക് ശേഷം സമാപന സന്ദേശം നല്‍കുകയായിരിന്നു പാപ്പ. ലക്ഷക്കണക്കിന് വിശ്വാസികളും ഇരുന്നൂറിലധികം മരിയൻ തീർത്ഥാടന കേന്ദ്രങ്ങളും പങ്കുചേർന്ന സമാധാന പ്രാർത്ഥനായജ്ഞത്തിൻ്റെ സമാപനത്തിൽ നൽകിയ സന്ദേശത്തിൽ സംഘർഷഭരിതമായ ഈ ലോകത്ത് ഇനിയും സമാധാനം സാധ്യമാണെന്നു പാപ്പ ഓര്‍മ്മിപ്പിച്ചു. മെയ് 30ന് വൈകുന്നേരം 7 മണിക്ക് വത്തിക്കാൻ ഗാർഡനിലെ ലൂർദ് മാതാവിൻ്റെ ഗ്രോട്ടയിലാണ് പാപ്പ ജപമാല പ്രാത്ഥനയ്ക്ക് നേതൃത്വം നൽകിയത്. ആഗോളസമാധാനമെന്ന ലക്ഷ്യത്തോടെയായിരുന്നു, പരിശുദ്ധ ദൈവമാതാവിൻ്റെ വണക്കമാസ സമാപനത്തിൻ്റെ കൂടി പശ്ചാത്തലത്തിൽ ഇത്തരമൊരു പ്രാർത്ഥനായജ്ഞം സംഘടിപ്പിക്കപ്പെട്ടത്. ദൈവവചനം ശ്രവിക്കുകയും അനുസരിക്കുകയും ചെയ്ത പരിശുദ്ധ കന്യകാമറിയത്തെ വിശ്വാസിയുടെ മാതൃകയായി വിശേഷിപ്പിച്ച പരിശുദ്ധ പിതാവ്, ജപമാലയിലെ ദിവ്യരഹസ്യങ്ങളുടെ ധ്യാനത്തിലൂടെ യേശുവാകുന്ന സമാധാനത്തെ കണ്ടെത്താൻ കഴിയുമെന്നും ചൂണ്ടിക്കാട്ടി.നിരപരാധികളായ കുട്ടികൾ, ദുരിതമനുഭവിക്കുന്ന മാതാപിതാക്കൾ, അഭയാർത്ഥികൾ, പീഡനത്തിനിരയായ തടവുകാർ എന്നിവരുടെ നിലവിളി ലോകം അവഗണിക്കരുതെന്ന് ഓർമ്മിപ്പിച്ച പാപ്പ, അധികാരമോഹവും വാക്കുകളിലെ അക്രമവും അവസാനിപ്പിച്ച് നീതിക്കും സത്യത്തിനും പ്രാധാന്യം നൽകേണ്ട സമയമാണിതെന്ന് മുന്നറിയിപ്പ് നൽകി. സ്നേഹിക്കുന്ന ഹൃദയത്തിൽ നിന്നാണ് യഥാർത്ഥ സമാധാനം ആരംഭിക്കുന്നതെന്നും, അനുരഞ്ജനത്തിൻ്റെ വാക്കുകൾ സംസാരിക്കുകയും ലോകത്തെ സൗമ്യതയോടും ജ്ഞാനത്തോടും കൂടി കാണുകയും ചെയ്യുമ്പോൾ, സമാധാനം വളരുമെന്നും പാപ്പ തൻ്റെ സന്ദേശത്തിൽ ഉദ്‌ബോധിപ്പിച്ചു.

KCBC News Highlights

വിശുദ്ധ കുര്‍ബാനയുടെ തിരുനാള്‍; ചരിത്രം സൃഷ്ടിച്ച് കപ്പലില്‍ ദിവ്യകാരുണ്യ പ്രദക്...

മുനമ്പം നിവാസികൾക്കുള്ള അവകാശം നിയമപരമായി പുനഃസ്ഥാപിക്കുമെന്നു മുഖ്യമന്ത്രി

യേശു ജ്ഞാനസ്നാനം സ്വീകരിച്ച ജോർദാനിൽ ആദ്യത്തെ ക്രിസ്ത്യൻ സർവ്വകലാശാല യാഥാര്‍ത്ഥ്...

പി.ഒ.സിയില്‍ ദൈവശാസ്ത്ര കോഴ്‌സ്

വിശ്വാസത്തിൻ്റെ പരസ്യ സാക്ഷ്യമാണ് ദിവ്യകാരുണ്യ പ്രദക്ഷിണം: ലിയോ പാപ്പ

അൽമുദേന മാതാവിന് ‘ഗോൾഡൻ റോസ്’ സമർപ്പിക്കാൻ ലിയോ പാപ്പ

ലിയോ പാപ്പ നാളെ സ്പെയിനിലേക്ക്

തീരദേശ വിഷയങ്ങളിൽ സർക്കാർ അനുകൂല നിലപാട് ആവശ്യപ്പെട്ട് വരാപ്പുഴ അതിരൂപത കെസിവൈഎം

400 ൽ പരം ബൈബിൾ കൈയ്യെഴുത്ത് പ്രതിയുമായി തൃശൂർ അതിരൂപത പള്ളിക്കുന്ന് അസംപ്ഷൻ ചർച...

സ്നേഹിക്കുന്ന ഹൃദയത്തിൽ നിന്നാണ് യഥാർത്ഥ സമാധാനം ആരംഭിക്കുന്നത്: ലിയോ പതിനാലാമൻ ...